Oos-Kaap padsterftes verdubbel oor feestyd

Deur Anita Dangazele

Padsterftes in die Oos-Kaap oor die feestyd het verdubbel in vergelyking met verlede jaar, met 202 mense wat hul lewens verloor het tussen 1 en 28 Desember.

Vervoer-LUR Xolile Nqatha het die skokkende syfers bevestig. Die DA se skaduminister vir vervoer, Kabelo Mogatosi, het gesê dit is ’n groot toename van die 97 sterftes wat in dieselfde tydperk verlede jaar aangeteken is.

“Die verlies van selfs een lewe op ons paaie is te veel,” het Mogatosi gesê. “Ons benodig beter wetstoepassing om die mense van die Oos-Kaap te beskerm.”

Die dodelikste paaie was die N2, waar meer as 42 sterftes plaasgevind het, en die R61, met meer as 21 sterftes. Die ergste ongeluk het op die N9 naby Graaff-Reinet gebeur, waar 14 mense in ’n enkele ongeluk dood is.

Mogatosi het die regering gekritiseer vir hul versuim om op te tree en gesê: “Hierdie tyd van die jaar het ’n tyd van hartseer vir so baie families geword. Die provinsiale regering moet meer doen om padveiligheidsreëls af te dwing.”

Hy het gewaarsku dat verkeer sal toeneem namate mense van hul vakansies terugkeer en het gepleit vir strenger maatreëls soos 24-uur-patrollies, padblokkades en dronk-bestuur-toetse. Hy het ook voorgestel dat Gemiddelde Spoed Oor Afstand (ASOD) kameras op gevaarlike paaie geinstalleer word en gesê dit werk goed in die Wes-Kaap.

Ten spyte hiervan, het Mogatosi verkeersbeamptes geprys vir hul harde werk onder moeilike omstandighede. “Baie werk 12-uur skofte om ons veilig te hou. Ons doen ’n beroep op alle padgebruikers om die reëls te volg en veiligheid ’n prioriteit te maak,” het hy gesê.

Foto hierbo: ’n Ongeluk tussen drie motors het Woensdagmiddag tussen Mount Ayliff en Kokstad plaasgevind.

Bron: Verskaf