Deur Nkhensani Mthombeni
Beesboere naby Giyani, Limpopo, is woedend nadat werkers in die Kruger wildtuin hul vee doodgemaak het. Die diere het in die park ingedwaal.
Daar is geen heining tussen hul dorpe en die park nie, en daar word vermoed dat stropers moontlik die heining verwyder het om makliker toegang tot die park te kry.
Letter Mabunda, wat namens die boere praat, sê hulle het oor die jare baie vee aan leeus of parkpersoneel verloor.
Olifante uit die park beskadig ook hul oeste.
“Ons het vir ‘n heining gevra, maar niks het gebeur nie. Selfs die voormalige minister van Landbou, Thoko Didiza, het vir die park gesê om die heining reg te maak, maar hulle het dit geïgnoreer,” het Mabunda gesê.
By ‘n vergadering met sommige van die boere by die park se Phalaborwa-hek op Vrydag 27 September, het parkamptenare gesê hulle het die vee doodgemaak om te verhoed dat siektes soos bek-en-klouseer na wild soos buffels, bokke en wildebeeste versprei.
“Daar is geen heining nie, so parkamptenare kan nie ons diere doodmaak nie,” het Mabunda gesê. “Hulle kan ons nie beboet vir oortreding nie. Baie boere is pensioenarisse wat hul spaargeld gebruik het om hierdie beeste te koop om hul gesinne te onderhou.”
Mackson Ngobeni, 71, van die dorpie Makhuva, het beeste verloor wat hy van sy pa geërf het. Hy sê 84 beeste wat aan vier mense behoort, het in die park verlore gegaan. Die park beweer daar was net 52, en hulle het 28 doodgemaak, met geen inligting oor die ander 24 nie.
“Ek is net ‘n pensioentrekker. Ek kan nie prokureurs bekostig soos SANParks nie. Ek wil vergoeding of ander beeste hê,” aldus Ngobeni, wat sy vee vir R10,000 elk verkoop.
Die boere wag op SANParks se reaksie oor vergoeding en ‘n heining.
SANParks-woordvoerder JP Louw het teen publikasietyd nie gereageer op ‘n versoek om kommentaar nie.
Foto hierbo: Beeste wat in die Kruger wildtuin ronddwaal.
Bron: Verskaf
